Góðan og blessaðan daginn lesendur nær og fjær til sjávar og sveita.  Vegna fjölda áskorana ( amk. tveggja ) höfum við ákveðið að opna heimasíðu Lundeyjar  aftur.  Eftir stíf fundarhöld á ritstjórnarskrifstofunni  hefur verið gert heiðursmannasamkomulag um aðkomu fleiri aðila að fréttatilkynningum síðunnar. Er það von veitustjóra að aukin fjölbreytni skapist með aðkomu fleiri aðila, og að lesendur verði duglegri að viðra skoðanir sínar á ritverkunum á síðunni.

Þar sem engar fréttir hafa borist af okkur hér á síðunni er rétt að fara vítt yfir sviðið og fræða lesendur um hvað á daga okkar hefur drifið.

Kvóti í íslensk/norsku síldinni  kláraðist um miðjan október eftir einstaklega leiðinlegt október veðurfar.  Var þá haldið með veiðarfærin til borgar óttans þar sem þau voru sett á land til yfirhalningar.  Að því loknu var siglt yfir flóann og bundið vel á Akranesi,  þar sem ýmsu viðhaldi og endurbótum var sinnt. Er þar helst að nefna að stjórnborðs lunning framan við dráttarblökk var hækkuð og komið fyrir hækkuðum ristum á dekki stjórnborðs megin. 

Í byrjun nóvember var haldið til borgar óttans þar sem ný og gríðarstór nót var tekin um borð og síðan haldið til loðnuveiða á Grænlandssundi. Þær veiðar gengu svona upp og ofan, aðalega vegna brælu og loðnuleysis.  Þó hafa  kallarnir náð að kroppa upp ein 1700 tonn af loðnu. Síðasta föstudag var síðan stóra loðnu feldinum spólað í land á Vopnafirði og lítill síldarnótarbleðill tekinn um borð.  Snemma á laugardagsmorgun var síðan slegið í gamla bláus og stefnan sett vestur  fyrir land til síldveiða á Breiðafirði.  Í birtingu á sunnudag renndu  kallarnir inn á sundin við Kiðey og Hrútey.  Ekki var síldin þar og voru menn farnir að tala um brostnar vonir þegar fréttir bárust af síld inni á Breiðasundi. Þar var síðan nótin látin fara á álitlega torfu eftir hádegissteikina ( og ís á eftir ) Eftir drjúga dælingu voru allar lestar hjá okkur orðnar fullar og afgangnum dælt yfir í Vilhelm Þorsteinsson. Var síldin að okkar mati óvenju stór og góð, og ekki urðum við varir við mikla sýkingu í henni.  Auk okkar voru á sjúkrahúsvoginum við Stykkishólm Kap VE og Ásgrímur Halldórsson SF og voru þeir að fá góð köst sem Villinn naut líka góðs af og fékk afgang hjá öllum skipunum. Til Vopnafjarðar komum við síðan í gærmorgun til löndunar  á síðustu 850 tonnum Íslandssíldar af síldarkvóta HB Granda.  Að löndun lokinni munum við síðan halda loðnuveiðum áfram ef veður leyfir, en þessa stundina er veðurútlitið á Grænlandssundinu ekki neitt sérstakt næstu daga. Má segja að HB Grandi hafi verið með tvö skip samfellt á loðnumiðunum frá 1.október en þá héllt Víkingur til veiða. Loðnan virðist halda sig í kalda sjónum og þá helst undir ís, svo ekki hefur gengið að veiða hana. Vonast menn til að hún fari að ganga austur í Íslensku lögsöguna  á sinni hefðbundnu gönguleið austur fyrir land.

 Að vanda var myndavélin með í síðasta síldartúr. Hér er Kap VE 4 með kraumandi kast á síðunni á Sjúkrahúsvoginum við Stykkishólm.

Nótin látin fara, Ásgrímur Halldórsson að dæla yfir í  Vilhelm Þorsteinsson í baksýn. 

Kraumandi síldin í nótinni á síðunni.

Hér má sjá upphækkunina á lunningunni og "danspallin" innan við......Þvílíkur munur.

Háhyrningurinn lætur sig ekki vanta í veisluna.

 Kátir voru karlar með kóka kóla í hendi......

Traffik á miðunum.....Kap að dæla yfir í Villann.

Allt í góðu...frí frammundan.

Vilhelm að koma á stútinn hjá okkur.

Veitustjóri þakkar fyrir sig að sinni og kveður...............BK..........

Góðan og blessaðann daginn lesendur til sjávar og sveita. Lundarnir slökuðu trolli í sjó í gærkvöldi og eru búnir að koma einu holi í kælingu. Eftir smá leit erum við farnir að toga aftur en sögur fara ekki af útliti.
 Nú styttist í að skólar hefjist og mun þá fjöldi ungs fólks hverfa frá sumarstörfum sínum og setjast á skólabekk. Samkvæmt heimasíðu vinnumálastofnunar voru 11.223 skráðir atvinnulausir í júlí, eða 6,6%.  Það ætti því ekki að verða vandamál að manna fiskvinslur og sláturhús landssins á komandi hausti....EÐA HVAÐ.. Undanfarnar vikur hefur mátt heyra í útvarpi viðtöl við ýmsa forsvarsmenn  hringinn í kring um landið, þar sem komið hefur fram að í viðkomandi sveitarfélagi sé atvinnuástand gott og skortur sé á húsnæði fyrir starfsfólk.  Síðastliðið vor voru vandræði að fá iðnaðarmenn og verkamenn til að vinna um borð í skipum og vinnslum sem undirbjuggu yfirstandandi síldar og makrílvertíð. Mörg dæmi eru um að þegar auglýst er eftir starfsfólki fást engin viðbrögð, mjög fáir eða engir sækja um. Þótt atvinnuleysisbætur séu nauðsinlegar er vitað mál að þær eru misnotaðar í stórum stíl. Þegar uppsjávarskip HB Granda hafa verið verkefnalaus hefur sjómönnum staðið til boða að mæta til vinnu og fá þá greidda tryggingu, en mæti þeir ekki til vinnu er litið svo á að þeir taki sér launalaust frí. Ég hef nú vanist því að fólk þurfi að mæta í vinnuna til að fá greidd laun, hef nú raunar talið það eðlilegt og sjálfsagt, en ef þú ert atvinnulaus getur þú skráð þig í gegn um tölvu og snúið þér svo á hina hliðina og haldið áfram að sofa. Ef maður skráir sig atvinnulausan, á maður að vera tilbúinn til að mæta til vinnu og þá held ég að einfallt væri að krefjast mætingar á ákveðna skráningarstaði og koma síðan á einhverri vinnuskildu. Það eru næg verkefni sem hægt væri að framkvæma, tína rusl og fegra umhverfið, moka snjó, aðstoða öryrkja og  gamallt fólk sem á erfitt, gróðursetja, svo eitthvað sé nefnt. Td. hafa fjölmiðlar farið mikinn um að höfuðborgin sé eins og órakaður útigangsmaður, illa hirt og sóðaleg. Það er allveg klárt mál að það myndi fækka verulega á atvinnuleysisskrá og menn færu frekar að leita sér að vinnu, ef einhverju svona kerfi yrði komið á. Eins og staðan er í dag sjá menn sér hag í að vera á bótum og vinna síðan svarta vinnu. Það þarf hugarfarsbreytinu til að breyta þessu, í dag finnst fólki ekkert athugavert við að vera á atvinnuleysisbótum og hafnar vinnu ef hún er ekki sniðin að þörfum þess. Það er ekkert skammarlegt og ekkert grín að vera atvinnulaus, en þegar hægt er að fá vinnu er annað uppi á teningnum. Það erum við hin sem greiðum skatta til samfélagsins sem borgum brúsan.
Eins og áður sagði verður fróðlegt að heyra fréttir að hvernig gengur að ráða starfsfólk til starfa í fiskvinnslurnar og sláturhúsin nú í haust.
 

Lundey NS 14 landar hjá HB Granda á Vopnafirði 2010

Hraunsrétt 2010

     Veitustjórakveðjur af Lundey.................................BK......................